അമ്മേ മൂകാംബികേ

എത്രനാളായീ ഞാനീ ദു:ഖഭാണ്ഢവും ചുമ-
ന്നെത്രയോകല്ലുംമുള്ളും നിറഞ്ഞ വീഥികളില്‍
യാത്രചെയ്യുന്നൂ, പാദം വേദനിയ്ക്കുന്നെങ്കിലും,
അത്രയില്ലിനിദൂരം താണ്ടുവാനറിവൂ ഞാന്‍

കരഞ്ഞ്‌വിളിയ്ക്കുമ്പോഴൊക്കെ നീയരികത്ത്‌
വരുന്നതറിവൂ ഞാന്‍, ആശ്വാസമേകീടുവാന്‍
വരങ്ങള്‍തന്നീടണേ, തെറ്റുകള്‍ പൊറുക്കണേ
പരംപൊരുളേ, എന്നെ കാത്തുകൊള്ളണേ നിത്യം.

പദ്‌മാസനസ്തേ, സര്‍വമംഗളമാംഗല്യേ എന്‍
ചിത്തത്തിലെന്നും, ഇന്നും നിന്‍നാമസഹസ്രങ്ങള്‍
എത്തി, ഞാനവിടുത്തെ പാദാരവിന്ദങ്ങളില്‍
കാര്‍ത്ത്യായനീ, ശങ്കരീ, പ്രാര്‍ത്ഥനകേട്ടീടണേ..