മാനസികാരോഗ്യം

എന്നെയല്ലാതെമറ്റാരെയും നോക്കരു-
തെന്നോടല്ലാതെ നീ മിണ്ടരുതാരോടു-
മെന്നെക്കണികണ്ടുണരണം; രാത്രിയി-
ലെന്നെപ്പുണര്‍ന്ന് കിടക്കണം നിത്യവും

മറ്റാരും കാണാതിരിയ്ക്കാന്‍ പൊതിയണം
ചുറ്റിലും നീ നിന്നെ കട്ടിവസ്ത്രങ്ങളാല്‍
മുറ്റത്ത്‌പോലുമിറങ്ങാതടുക്കള-
ച്ചുറ്റിലടങ്ങിയൊതുങ്ങിക്കഴിയണം

എന്‍പാനപാത്രങ്ങളെന്നും നിറയ്ക്കണം
എന്മുന്നില്‍ മാത്രം നീ ആടണം, പാടണം
എന്‍രുചിനോക്കി നീ വെച്ച്‌ വിളമ്പണം
എന്‍കുഞ്ഞ്‌മക്കളെ പെറ്റുവളര്‍ത്തണം.

ഇത്രയും മാത്രം മതി,യെനിയ്ക്കല്ലാതെ
അത്രയ്ക്കുമേലുന്നും വേണ്ട, തിരിച്ചുട-
നെത്തണം മാനസികാരോഗ്യകേന്ദ്രത്തി-
ലൊട്ടും മുടങ്ങരുതല്ലോ, മരുന്നുകള്‍!