നീ..

ഫെബ്രുവരി..2


നാദമാണെനിക്കു നീ, കരയും മുളന്തണ്ട-
ല്ലീണമാണെനിക്കു നീ, വീണതന്‍ തന്ത്രിയല്ല
താളമാണു നീ,യേതോ തുടിയ്ക്കും തുടിയല്ല
ഗാനമാണെനിക്കു നീ പാട്ടിന്‍ പദങ്ങളല്ല

പൂവണിയാതേ നില്‍കും സ്വപ്നമാണെനിക്കു നീ
പൂക്കളും, പൂന്തേനും, കാര്‍വണ്ടിന്റെ മൂളിപ്പാട്ടും
പൂനിലാവൊഴുക്കുന്ന കുളിരാണു നീ, മേട-
പ്പൂക്കൊന്നയേകും സ്വര്‍ണ വര്‍ണക്കണിക്കാഴ്ചയും

ഓര്‍മയിലൊളിപ്പിച്ച മയില്‍പീലിയാണുനീ
കേള്‍ക്കുവാനെന്നും കൊതിച്ചോരു താരാട്ടുപാട്ടും
നീറുന്ന മനസ്സിന്റെ സാന്ദ്വന സ്പര്‍ശം നീയേ
തൂലിക തുമ്പത്തിരുന്നൂയലാടുന്ന വാക്കും