Tuesday, April 8, 2008

ഇന്നലെ


സ്വര്‍ണ്ണവര്‍ണ്ണപുഷ്പങ്ങളണിഞ്ഞൊരു
കൊന്ന, മേടപ്പുലരിയിലെന്നപോല്‍
കണ്ണിനിമ്പംപകര്‍ന്ന്‌ നീ യിന്നലെ
നിന്നു; പൊന്നിനെപൊന്നണിയിച്ചപോല്‍.

ഏറെയുണ്ടായിരുന്നവിടാളുകള്‍
വേറെ, വേറെ കാര്യങ്ങള്‍ക്ക്‍വന്നവര്‍
മാറിനിന്നൂ, ചിരിച്ചൂ കടക്കണ്ണി-
നേറതെങ്കിലും കിട്ടിയാല്‍ ഭാഗ്യമായ്‌.

തെന്നിമാറി മേഘങ്ങളകലവേ
മിന്നിനില്‍ക്കും ശശിബിംബമെന്നപോല്‍
പിന്നെ, നീ താരറാണിയെപ്പോല്‍നിന്ന്
എന്നെ കണ്ണാലുഴിഞ്ഞു; ചിരിച്ചു നീ

വല്ലതുമൊന്ന് മിണ്ടിയാല്‍ സ്വപ്നമാം
ചില്ലുമേട തകര്‍ന്നിടും, വാക്കുകള്‍
ഇല്ല, വന്നില്ല എന്‍ കണ്ഠനാളത്തില്‍.
ഇല്ലുറങ്ങാന്‍ കഴിഞ്ഞില്ല, യിന്നലെ...

4 comments:

  1. നല്ല വരികള്‍!
    സ്നേഹം നിറഞ്ഞ വീഷു ആശംസകള്‍.

    ReplyDelete
  2. This comment has been removed by the author.

    ReplyDelete
  3. നന്ദി, വാല്‍മീകി, ശ്രീ..

    ReplyDelete