Thursday, April 9, 2009

വിഷു-2009

പൊന്നണിഞ്ഞെങ്ങും നിരന്ന്നില്‍പ്പായ്‌ കണി-
ക്കൊന്നയീമീനമാസത്തില്‍ത്തന്നെ
എന്നോചെറുപ്പത്തില്‍കണ്ട കണികളെ
ഇന്നുമതോര്‍മ്മപ്പെടുത്തിടുന്നു.

ഉണ്ണികള്‍ ഞങ്ങളുറങ്ങീടവേ അമ്മ
കിണ്ണത്തിലെല്ലാം ഒരുക്കിവയ്ക്കും
കണ്ണുകള്‍പൊത്തി,വിളിച്ചുണര്‍ത്തും ഉണ്ണി-
ക്കണ്ണന്റെരൂപം കണികാണുവാന്‍.

എണ്ണത്തിരി,നാളികേരത്തില്‍; പൂക്കളും,
പൊന്നും, പണവും, കണിക്കൊന്നയും,
കണ്ണാടിയും, കൊതിതോന്നുംപഴങ്ങളും;
പിന്നെയഛന്‍തരും കൈനീട്ടവും.

വെട്ടമാകുന്നതിന്‍മുന്‍പ്‌, മത്താപ്പിന്റെ-
പെട്ടിതുറക്കും, തുടര്‍ന്ന് പടക്കങ്ങള്‍
പൊട്ടിയ്ക്കും, കമ്പിത്തിരിപ്പൂക്കള്‍കത്തിച്ച്‌
പൊട്ടിച്ചിരിയ്ക്കും, മറക്കുമെല്ലാം.

ഇന്ന്,വിഷു, ചാനലില്‍ക്കൂടി റ്റീവീടെ
മുന്നിലിരുന്നാസ്വദിയ്ക്കുമ്പൊഴും
എന്നോകടന്നുപോയാസുദിനങ്ങളെ
ഇന്നുമോര്‍ക്കുന്നു, വിഷാദത്തൊടേ

3 comments:

  1. വിഷു ആശംസകള്‍ .. .. ...

    ReplyDelete
  2. കവിത നന്നായിട്ടുണ്ട്. ഒപ്പം വിഷു ആശംസകളും നേരുന്നു.

    ReplyDelete