അദൃശ്യ

-------

സ്വപ്നങ്ങളില്‍‌നിന്നൂര്‍‌ന്നുവീണ
വാക്കുകളുടെ വെണ്‍‌മുത്തുകള്‍ പെറുക്കി,
മനസ്സിലെ വര്‍ണ്ണനൂലില്‍‌ കോര്‍ക്കാനൊരുങ്ങേ,
എന്നെയെന്റെ മോഹനിദ്രയില്‍‌നിന്നും
ഉള്ളുരുക്കുമൊരു കാതരശബ്ദത്താല്‍
വിളിച്ചുണര്‍‌ത്തിയതെന്തേ ?
അശാന്തിയുടെ തീരങ്ങളില്‍ ,
അഗ്നിച്ചിറകുള്ളകാറ്റു‌മേറ്റ്,
ശാപഗ്രസ്തമായൊരു ജന്മം‌പോലെ
എങ്ങോട്ടെന്നില്ലാതെയലയവേ,
ആര്‍ദ്രമായൊരുഗാനാലാപത്താല്‍
പിന്‍‌വിളിവിളിച്ചതെന്തേ ?
ചെരാതിലെ ഒറ്റത്തിരി
പൊടുന്നനെ അണഞ്ഞപ്പോള്‍
രാവെളിച്ചം പോലുമില്ലാത്ത കൂരിരുട്ടില്‍
ഞാന്‍ തീര്‍ത്തും തനിച്ചായപ്പോള്‍
എന്റെയാകാശതാമരേ !
നീയും അദൃശ്യയായിനിന്നതെന്തേ ?