നീനു ജോസ്‌

മിണ്ടിയിട്ടുണ്ട്‌; പലതവണ ഫോണി,ലെന്നാല്‍
കണ്ടിട്ടില്ലിന്നേവരെ, എന്‍മകള്‍ നീനുവിനെ
അമ്മയുണ്ടപ്പനുണ്ട്‌ അവള്‍ക്കെന്നാലുമെന്റെ
അമ്മുവാണത്രെയമ്മ, അഛനായീയുള്ളോനും

എട്ടിലാണവള്‍, ചേച്ചി ഒമ്പതില്‍, രക്ഷിതാക്കള്‍
പട്ടിണിമാറ്റാന്‍ കൂലിവേലയ്ക്കു പോവുന്നുണ്ട്‌
'മട്ടമ്മലയില്‍ വീട്‌'; നേര്യമംഗലം പോസ്റ്റ്‌
പട്ടണം എറണാകുളം, കോതമംഗലം വഴി

കത്തവളെഴുതാറുണ്ടിടയ്കീ അങ്കിളിനും
കൃത്യമായ്‌ മറുപടി അയയ്കാറുണ്ടീ ഞാനും
എത്ര മോഹങ്ങളുണ്ടാം ആകൊച്ചു മാലാഖയ്ക്കും
എത്തിപ്പിടിയ്കാനൊരു വള്ളിമാത്രമാണീ ഞാന്‍